NNXX lamenta pasamento de D. Manuel Fraga Iribarne

O presidente de NNXX transmite o máis sentido pésame aos familiares e achegados de don Manuel, aos populares, que quedan políticamente orfos, e ao pobo galego en xeral

Novas Xeracións lamenta profundamente o pasamento de don Manuel Fraga e promete perpetuar o seu valioso legado

• Javier Dorado asegura que don Manuel Fraga é un exemplo a seguir non só en Galicia, senón tamén a nivel estatal, por ser un dos pais da Constitución, un dos protagonistas da Transición e o fundador do partido con máis apoios de España

• Novas Xeracións de Galicia non pode máis que sentirse orgullosa por formar parte do proxecto político que Fraga creou e comprométese a traballar arreo pola comunidade cuxo nome levou alí onde foi

Santiago de Compostela, 16 de xaneiro de 2011.- O presidente de Novas Xeracións de Galicia, Javier Dorado, lamenta profundamente, en nome da formación xuvenil, o pasamento de don Manuel Fraga Iribarne, pero asegura que o Presidente Fundador do Partido Popular deixa no país unha canteira disposta a perpetuar o seu valioso legado.

Javier Dorado tamén quere transmitir o máis sentido pésame dos membros de Novas Xeracións á familia e aos achegados de don Manuel, así como aos populares, que coa súa marcha quedan políticamente orfos, e ao pobo galego en xeral, que sempre estará en débeda co seu defensor máis acérrimo.

Como asegura Dorado, para os membros de Novas Xeracións don Manuel Fraga é un exemplo a seguir non só en Galicia, onde foi autor da maior modernización que experimentou a comunidade, senón tamén a nivel estatal, por ser un dos pais da Constitución, un dos protagonistas da Transición e o fundador do partido con máis apoios de España.

Os mozos e mozas de Novas Xeracións de Galicia non poden máis que sentirse orgullosos por formar parte do proxecto político que Fraga creou e comprométense a traballar arreo pola comunidade cuxo nome don Manuel levou alí onde foi.